د. يس محمد ابراهيم
الرخيس بي رخستو....
(بوست عام)
"يا باشمهندس ياخ ما تباركها ... "
بداية المفاصلة في التكاليف ...
... يتوسط النقاش تلمحيات من شاكلة ... انو "الخرطة" دي ما حاجة محتاجة النقة الكتيرة دي و بالله ما "تخمنا ساكت"...
تنتهي ضمنيا -او حتى صراحة- بانو في مكتب/شخص بيشتغل بي نص السعر ...
و بسلمنا "الخرط" في اسبوع بس...
ما اظن في مهندس اشتغل شغل خاص "جّلا" من السناريو الحزين دا...
والقصة بتسوء اكتر كلما تزيد نسبة (الذاتية/subjectivity) في الخدمة المقدمة (الاعمال الفنية كمثال).
تردي الذوق العام ، بالاضافة الى "السلبطة" ورداءة مستوى المنتج الهندسي بصورة عامة، بتخلينا نوعا ما نقيف مع صاحب الحق (طالب الخدمة)، باعتبار انه ما عارف كيف يميز الكويس من الكعب...
صورة بالف كلمة....
حقيقة ... الصورة التحت دي ما محتاجة تعليق- ومن المريح الزول يوريها لي عينة الناس البتفاصل بأسلوب تبخيس زمنك ومجهودك-...
لكن برجع اقول... ما كل اللوم على المستفيد (مع انه هو الخاسر الأكبر في المعادلة)...
والبوست دا موجه لاصحاب الحق... (المهندسين جايينهم قدام -ان شاء الله-).
في الصورة دي كمثال...
الزيون غلط في البداية لانو غالبا مشى لي أرخص عرض...
ما سأل نفسه ليه الزول دا سعروا رخيص (اتخيل نفسك عاوز تشتري وجبة -ولقيت محل بديك ليها بي سعر اقل من المعقول/المتعارف) ...
الغلط المحتمل التاني... ما طلب من الرسام اي عينة /صورة لي شغل عملوا قبل كدا... (لو كان طلب صورة او البوم أعماله الفاتت كان عرف المقلب الراجيهو)...
طيب .... افترض انو العمل اللي انت طالبه ... صعب عليك تقييم جودته او صحته من عدمها...
مثلا ... عاوز زول يعمل ليك موقع إلكتروني ...وانت بالنسبة ليك المواقع دي كلها حاجة واحدة طالما بتفتح في المتصفح/قوقل...
في الحالة دي ممكن تسأل عن الشخص (المبرمج/مصمم الموقع) في المجمتع المهني بتاعوا... تاريخ عمله ... وحجم الاعمال بتاعته... وتسأل ... هل عمل موقع لي ياتو جهات معروفة قبل كدا ... وهل الموقع اللي عمله دا شغال كويس...
وتقارن السعر اللي عرضه مع المتعارف عليه...أو السعر اللي بيطلبوهوا اقرانه (من ناحية خبرة، ومؤهلات، الخ)...
والاهم من كدا ... هل في وسيلة تضمن حقك او تعوضك في حال حصلت مشكلة في الموقع بسبب المبرمج...
في الاتجاه التاني ...وعلى الرغم من انه عادة بتكون العبارة "الغالي بي غلاتو" صحيحة - ... ما ننسى برضوا انو الاغلى ما بالضرورة هو الافضل ... لانو في المستهبلين والمتسلقين/المبالغين في تقدير نفسهم (overestimated)- زي صاحبنا الرسام المستجد دا-
طيب اللي بيطلب سعر اعلى دا...بيطلبوا على اي اساس ويخليهوا يزيد على "المعقول"...
هنا بيظهر مفهوم القيمة (value) ... وفرقها من مفهوم التكلفة (cost) ... على الرغم من انه عادة بيرتبطوا بي بعض... الا انه الفرق مفهوم ...
ببقى واجب مقدم الخدمة انه يوضح قيمة المنتج ... عشان برضوا الزيون يقدر يقدّر تكلفة تتناسب مع قيمة/جودة العمل...
ويعرف انه دي هي الجودة المتوقعها ... وانو قاعد يصرف قروش قصاد جودة بنود/بند معين متعارف عليه.
بمعنى ... ممكن تكون الجودة اللي بسببها السعر عالي هي سرعة الاداء (تنفبذ) .... واللي ممكن ما تكون من اولويات الزبون (صاحب البيت).
ببقى واحد من الشروط اللي بتضمن حق الطرفين هو التواصل الفعال وتوصيل المعلومة وربط جودة وقيمة العمل بالمقابل المادي المناسب ... والاتفاق عليها من البداية ...
(ملاحظة شخصية: سوء التواصل واحدة من امهات الكوارث ... هم قايلين ... وما كنا قايلينهم .. الخ)
خلاصة البوست...
السيد المستفيد / الزيون... دائما ح تلقى زول أرخص ...
وفي النهاية ممكن تصل لي زول يعمل ليك "ضبانة" بدل الحصان ... زي صاحبنا الفي الصورة دا....
ضبانتو دي يا يكون لافي بيها كدا ... يا كمان دفع اكتر من الاول عشان يمسحها....
لكن للضمان... اهون من الغلط لو اتعمل في بيتك/عماراتك...
---------------
مصدر البوست عبارة عن مقال على (LinkedIn) تمت سودنته واعادة صياغته... موجود في الرابط ... في اول تعليق ...
المقال بسيط ومعبر... انصح بي قرايته (600 كلمة)...
--
الصورة نوعا ما مشهورة ...
(there's always someone who will do it cheaper)
... معبّرة ... مُش
ليست هناك تعليقات:
إرسال تعليق