الرئيسية » , » ملخص عن محاضرة تأهيل كبري النيل الأزرق .... م. رشا برير

ملخص عن محاضرة تأهيل كبري النيل الأزرق .... م. رشا برير

Written By Amged Osman Abdelatif Mohammed on الأحد، أكتوبر 22، 2017 | 9:40 ص

م.  رشا برير  
Blue Nile Bridge 

حاحاول هنا الخص الندوة الكانت في قاعة الشارقة عن حالة الكبري و اللي اتكلم فيها ممثلين الوزارة  و الاستشاري المشرف علي المشروع و اللي عقبو فيها دكاترة (جهابزة) و قالو كلام كان بالنسبة لي جديد شديد رغم اني قاعدة في قلب المجال ده بي حكم اني مقاول bridges.  

* الاستشاري المشرف  - واللي هو نفسو كان مشرف علي صيانة كبري النيل الابيض - اتكلم عن الحالة المتردية الوصل ليها الكبري (corrosion,deflection in some member,collapse in deck slab ,problems inpiers.. . . Etc) و  الاجزاء المدفونة من الكبري سواء في بحري او الخرطوم كان ليها النصيب الاكبر في التدهور وانهم لسة مع ال inspection بكتشفوا في الmemebers المتضررة و من ثم حيقرروا يتعملوا معاها كيف سواء بي استبدال اوتدعيم اوغيرو .     اما بالنسبة للpiers فتقريبا  المعالجةمقررة مسبقا و شبيهة للحصل في كبري النيل الابيض  و هي تقريبا اضافة casing بقطر اكبر حول الpiersو ملا القاب بي خرسانة مع بعض المعالجات لي تزريع و غيرو . .

* نجي بقي للمعقبين و ديل هم (الزيت) الصراحة : اتكلم دكتور (ابو بكر عبد الوهاب ،محمد احمد عثمان ،الطيب اونسة ،يوسف تبن ،جلال ،مدثر سليمان ،الفاتح محمد علي ، احمد موسي صيام  و غيرهم وملخص كلامهم كان في النقاط الاتية :
-كل الدراسات اللي اتعملت من سنة1960-2009 و عددها افتكر  اربعة او خمسة دراسات اخرها دراسة من شركة جيلين مرورا بي دراسة ممتازة جدا قام بيها بروفيسور دفع الله الترابي هو ونخبة ممتازة   اتفقت علي ان جسم الكبري الاساسي بي حالة ممتازة جدا  وانو ال actual loads الواقعة علي الكبري تمثل تقريبا 20%  فقط من  الاحمال المصمم عليها الكبري وانو الstrength  الواقع علي الpiers  هو 1.2Mp مقابل 10Mp ممكن تتحملو ، و انو المشكلة الكانت ظاهرة في كل الدراسات كانت بي صورة اكبر في السكة حديد و دي تم فيها تنسيق في مراحل مختلفة  مع هيئة السكة حديد لتخفيف سرعة القطارات و احمالها و في نفس الوقت تغيير القطارات و استعمال انواع جديدة منها ساعد كتير في تخفيف الحمل علي مسار السكة حديد في الكبري . .  وانو الوقت الاتصمم فيه الكبري كانت الfactor  for design كبيرة جدا لانو في وقتها  ال soil mechanics ما كانت معروفة بي شكلها الحالي و بالتالي كان (ديزاين خوف علي قول احد زملاءنا ).

- طيب الكلام الفوق ده ما معناه ابدا ما يتصان الكبري بل علي العكس لازم يتصان بس ما بي السهولة دي ، لانو قرار انو مثلا استبدل member ولا اقلب مسار مشاة لي مسار عربات و لاغيرو لازم يتعمل ليه re. Analysis لانو ممكن جدا تنشا منو حسابات تجوط القصة كلها بدل ماتصلحها بالاضافة لي انو  البقرر انو ده مثلا صدا سطحي  او محتاج sandblasting لازم يكون عندو خبرة ودراية و ما قرار ساهل . . . في الوقت نفسو الاتصال بالشركة المصممة و الشركة اللي اشرفت علي التنفيذ زماان امر مهم و التنسيق معاهم في كيفية الصيانة .
- جانب مهم جدا اشار ليه احد  دكاترتي البحبهم جدا و هو انو الواضح تماما انو ال scope of work ما محدد لسة بدليل انو بقولو لسة اكتشفنا و لسة ما عارفين تاني حيكون في شنو و غيرو و غيرو طيب علي اي اساس اتحدد زمن الصيانة بي سنة ؟؟؟؟؟ و خوفي السنة زاتها ما تكفينا ، و ضرب مثال بي كبري في دولة اخري انو investigation & determination of scope اخد قرابة السنتين عشان يجو يصينوه في اقصر فترة ممكنة (ما متذكرة الفترة القالها بس اظنها كانت 3 شهور من غير اغلاق كلي ).

- اثيرت برضو نقطة انو عدم وجود صيانة و استكشاف دوري لي كل الكباري بيخلينا موضوعين تحت ضغط اتخاذ قرار الصيانة بي سرعة لما يحصل كارثة و ده في الاغلب بيخلينا نتبني خيار قد يكون هو الاطول زمنا و الاكثر  تكلفة.

- حاجة مهمة جدا بالنسبة لي اثيرت و هي انو الكبري ده محكوم بي قوانين اليونسكو للاثار و صيانتو لازم تكون في حدود اصلاحو دون اي اضافات في المسارات مثلا و حتي اللون محكوم وما خيار شخصي .

نقاط مظلمة :
- احد/ى المتحدثين اتكلم بفجاجة عن انو السكة حديد زاتها لزومها شنو تشق الخرطوم و هم زاتهم ناقلين لينا شنو مهم قدر دا او كما قال/ت !!!!!!!

- متحدث/ة تاني كان رايو انو كيف يقولو اثري و ناس الاثار يشوفو ليهم غرفة فيها وطاويط ولا مبني قديم ما مستخدم و يقولو  تبعهم مش كبري  )!!!!!!! 

نقاط مضيئة :
- وزير الطرق و الجسور اتقبل كل الاراء بي طريقة محترمة و صدر رحب  واتبني فكرة انو الصيانة تتعمل ليها لجنة من الدكاترة الشاركو قبل كده في الدراسات للكبري ده و رايهم يحترم ، و من الجميل برضو انو ادي ناس الاثار حقهم و ما افترض انو شغلهم بس الاشراف علي الوطاويط .

- تم برضو اجازة فكرة انو يكون في تدريب  للكادر السوداني (مقاول واستشاري) في المشروع  و طبعا النقطة دي بالذات تمثل مصالح شخصية لي ;-)

-كل اللي اتكلموا من دكاترتنا الكبار و اللي كنا بنشوفعم واحنا صغار ناس صعبين اتكلموا عن ارتباطهم العاطفي و التاريخي بالكبري  وانهم مستعدين يساهمو بي كل اجتهاد عشان يعملوا الحل الامثل ليهم ، بعضهم كان شبه معبور و هو بيتكلم عن افضلية قيام و صيانة بعض الكباري التانية عليه  وانو ما ذكرت الخرطوم الا وذكر كبري النيل الازرق والابيض . . . كلهم كان عندهم  استعداد لي عمل اي شي للحفاظ عليه وده شكل حب الوطن البجذبني دايما مش شعارات من ساسة مؤيدين كانوا ام معارضين
شارك هذا المقال :

ليست هناك تعليقات:

إرسال تعليق

 
Support : Creating Website | Johny Template | Mas Template
copyright © 2011. سوداكون - All Rights Reserved
Template Created by Creating Website
Proudly powered by Blogger