الرئيسية » » نحن بنغرق ليه؟ (1) .... م. أحمد فؤاد

نحن بنغرق ليه؟ (1) .... م. أحمد فؤاد

Written By Amged Osman on الثلاثاء، سبتمبر 17، 2019 | 12:48 م

 م. أحمد فؤاد    

نحن بنغرق ليه؟(1)
 2019
#ونسة
#نحن_بنغرق_ليه
#حنبنيهو
#تسقط_تاني

مرت خمسة سنوات من اخرمرة كتبت فيها عن الخريف و عن حالات الغرق و الوفاة السنوية البتحصل في البلد. المرة الفاتت الاستفزاني للكتابة هو اني سمعت احد المسئولين بيصرح في التلفزيون انه من اسباب الغرق في السودان هو نقص المروءة في السودانيين. والحمد لله الذي اذهب عنا الاذى و عافانا اتوقع\اتمنى انه المسئول المذكور السنة دي مستمتع بحصاد عمله في مزبلة التاريخ.
المرة دي اكتب بأمل البحث عن حلول الكيزان في خلال التلاتين سنة الفاتو اصرو انها مستحيلة.
طيب...
نحن بنغرق ليه؟
الاجابة الاساسية تلاتة حاجات:
- الامطار
- السيول
- الفيضان
أما الإجابات التبريرية التقليدية البنسمعها كل سنة فمتنوعة و"خلاقة" و هنمر على عدد منها ان شاء الله.

قبل ما نبدا نرجع للأساسيات و نوصف طبغرافية ولاية الخرطوم: منطقة ما بين النيلين منطقة سهلية منبسطة مع ميلان بسيط للشرق و الغرب باتجاه النيلين الأزرق و الأبيض و انحدار عام باتجاه الشمال (اتجاه جريان النيل). بالنسبة لي شرق النيل و امدرمان فالمنطقة السهلية محدودة بمرتفعات من ناحية الشرق و الغرب. تقريبا فرق الارتفاع بين اخفض مناطق الولاية (مجرى النيل) و قمم المرتفعات المذكورة حوالي 100 متر. الالوان في الخريطة المرفقة بتدل على الارتفاع، المناطق الخضراء هي الاكثر انخفاضا و البيضاء هي الاعلى.

قمم المرتفعات دي بتشكل خط لتقسيم المياه بين الولاية و بين الولايات المجاورة. الخط ده في ابعد نقاطه في شرق النيل بيبعد عن النيل حوالي 64 كيلومتر تقريباً. و بيقترب من النيل لحدت 15 كيلومتر في شمال الولاية. في امدرمان خط التقسيم بيوازي النيل تقريبا و بيبعد عنه حوالي 40 كيلومتر تقريباً.

خط التقسيم ممكن يتحسب من الارتفاعات، زي الخطوط الزرقاء في الخريطة الأولى. أو يمكن التعرف عليه "بالنظر" من صور الاقمار الصناعية في قوقل مابس زي الخط الاحمر في الصورة التانية.

الكلام ده رغم انه بسيط و بديهي الا انه بينفي "الخرافة" بتاعت انه السيول بتجي من البطانة عشان تغرق شرق النيل و و من كردفان عشان تغرق امدرمان.و للأسف الشديد رددوها الكيزان بما يكفي لأنه تبقى من المسلمات و يرددوها وراهم مهندسين "كبار" خليك من الناس العاديين من خارج المهنة.
الزيت:
• مافي سيول بتجي من كردفان ولا من البطانة.
• مدينة الخرطوم مسطحة بانحدار بسيط، على عكس امدرمان و بحري العندهم انحدار ملحوظ باتجاه النيل.

الخرائط المرفقة من انتاج زملاء استخدمتها بدون استئذان، حقهم الادبي محفوظ زي حقهم في الخصوصية

نواصل

つづく
شارك هذا المقال :

ليست هناك تعليقات:

إرسال تعليق

 
Support : Creating Website | Johny Template | Mas Template
copyright © 2011. سوداكون - All Rights Reserved
Template Created by Creating Website
Proudly powered by Blogger