الرئيسية » » طريقة مونت كارلو .... م. عبد الله جعفر

طريقة مونت كارلو .... م. عبد الله جعفر

Written By Amged Osman Abdelatif Mohammed on الأحد، أغسطس 07، 2016 | 3:29 م

‫م. عبد الله جعفر

#‏ونسة‬
◾️طريقة مونت كارلو◾️
بعيدا عن ميسي وقميصه 😏
دار نتونّس شويّة عن حاجة من شغلنا
(دي ما الونسة الموعودة عن شغلي 😁 بس حاجة من وحي البحث الحالي)
😃: مونت كارلو دي بتاعة القمار 🤔
😎: بس ياهي ذاااتا 😄 ومال قايلنا بنعمل في شنو 😅
لمن تكون ما عندك طريقة تحليليّة تتأكّد بيدخل في الموضوع شي من المغامرة، والمقامرة؛
بس مقامرة بي فهم، ما ساي 😄
جدير بالذكر إنّه القمار لعب دور مُقدَّر في علم الاحتمالات
..
🤔 يكون عشان كدا السلفيين ما بيحبّوا يدخّلوا احتمالات في الدين؟
ما علينا 😏
خلّينا في ونسة مونت كارلو (بتاعة القمار ما الراديو)
▪️الطريقة، على السليقة▪️
طالما الموضوع جاب ليو قمّار خلّينا نتمّها وندخّل فيو طبيخ كمان 😄
قول مثلا داير تعمل سليقة، سليقة ساااي بس لا غير؛
وقول عندك الفكرة العامَّة، لكن ما عارف التفاصيل
يعني عارف إنّه في لحمة بيسلقوها،
والآن: داير تتعلّم صناعة السليقة بالتجربة والخطأ؛
خلّينا نبدأ بي موية وملح، الموضوع كدا بسيط؛
وبيتحلّ بـ"الطرق العدديّة":
في كلّ تجربة ح تكب كَمِيَّة ملح،
ما بين أحسن تجربة ملحها طلع زايد،
وأحسن تجربة ملحها كان شويّة؛
لحدّي ما الطعم يظبط.
(راجع ونسة عشرين سؤال 0️⃣)
▪️اللعنة!▪️
الكلمة دي هنا ما عندها أيّ علاقة بي أنيس عبيد،
وللا هاشتاق ‫#‏تبا_لكم‬ 😒،
بل الحاصل إنّه في حاجة فعلا اسمها curse of dimensionality 1️⃣
بتحصل لمن الموضوع يكون فيو أبعاد كتيرة
😃: أبعاد يعني شنو 🤔
رجوعا لي سليقتنا،
الموضوع طبعا ما موية وملح؛
بل فيو بهارات كتيرة.
البهارات العندك قول ملح، كزبرة، توم، شمار، فلفل، وماجي.
وانتا ما عارف بيكبّوا ياتو بهارات بالضبط، وقدر كيف؛
وباعتبار سمعتك كشيف وكدا (‫#‏رمضان_في_بلاد_الألمان‬ 😉) فما ح تقدر تستعين بصديق؛
ف ح تواصل بالتجربة والخطأ.
يللا دي مسألة ليها أبعاد؛
أو كما قال أبو الأمين؛
بُعد، أو محور، ببساطة، يعني حريّة اختيار؛
يعني كلّ واحد من البهارات دي بيمثّل بُعد مستقل في مسألة السليقة، 
لأنّه عندك الحريّة أثناء تجربتك تكب من كلّ واحد حسب ما يبدو لك؛ بعيدا عن التانيات
(بمعنى: لو كبّيت علبة الكزبرة كلّها ما ح تضوق طعم شمار 😏)
(لو التوم مثلا وللا الماجي فيهم ملح بيبقوا ما أبعاد مستقلّة)
خلّينا نبسّط المسألة أبسط ما يكون ونخلّي الأبعاد دي ثنائيّة، binary: كلّ بهار يا ح تكبّو يا لا.
محتاج كم تجربة؟
شان تدرس كل الاحتمالات ح تحتاج لي ٦٤ تجربة 😳!!
▪️"البيجرّب المجرّب بيكون عقله مخرّب"▪️
أو كما قال المثل في المسلسل السوري؛
حتّى السليقة صعب تحصي احتمالاتها؛
فلو عندك فرصة خمسة تجارب بس، ما ح تمشي بالدور؛
ح تعمل شنو طيّب؟
😃: ترمي ريال لكل بهار، طرّة وللا كتابة، وتختار 😄
😎: إجابة صحيحة
😃: 😳
زي ما قلنا، شغل مونت كارلو دا قمار بي فهم.
طريقة طرّة كتابة، وللا اختيار عشوائي لكلّ بعد، في كلّ تجربة، دي باختصار طريقة مونت كارلو؛
الفكرة ببساطة إنّه كلّ تجربة زيادة، في المتوسّط، ح تقرّبك أكتر للإجابة الصحيحة؛
لأنّه كلّ تجربة ح تكون فعلا "تجربة" جديدة، وبالتالي ح تتعلّم فيها حاجة جديدة
بغض النظر عن عدد الأبعاد.
الشرط الوحيد إنّه الاختيار يكون عشوائي تماماً؛ وبعد كدا ديك يا نظريّات،
▪️الديموقراطيّة▪️
مسائل تانية في الحياة بيكون عندها أبعاد اكتر كتير من السليقة
والبعد الواحد خياراتها ما صفر وواحد، بل كلّ الرينج بين قيمة عليا وقيمة دنيا.
السياسة والاقتصاد أبعادهم كتيرة جدّا،
المطلوب غالبا توقّع المستقبل،
والإجابة الصحيحة طبعا ما معروفة مسبقا؛
ولذلك يمكن التعامل معها بطريقة مونت كارلو.
في كتير من الأحيان بيكون استطلاع رأي الجماهير كافي للاختيار العشوائي لتطبيق الطريقة
ودا بيدّي فكرة عن ميزة الديموقراطيّة كطريقة لإدارة المجتمع: طريقة مونت كارلو بتشرح ليه الدول الديموقراطيّة فرصها أحسن في المدى البعيد.
اتفتح نقاش في نايلرود 2️⃣ قبل كدا عن قرار زي Brexit هل يترك للجماهير وللا المختصّين؟
مبدئيّا، القرارات الزِّي دي أبعادها اكتر من أن تحيط بها حفنة من المختصّين
في الحقيقة ما معروف أبعادها قد كيف، خلّيك من الخيارات في كلّ بعد.
فالموضوع لن يخلو من مغامرة، ومقامرة.
.
▪️شغلنا▪️
😃: قلتا لي شغلكم طلع سليقة ساااي 😄
يللا للعنده فضول يعرف علاقة مونت كارلو بالقرافيكس شنو ح أقدّم شرح مبسّط اختم بيو.
لو داير ترسم صورة بالكمبيوتر، فالموضوع بيتلخّص في حساب اللون الأنسب لكلّ نقطة، أو pixel، في الشاشة.
المسألة فيها مسألتين كبار:
تحديد اللون الأصحّ لكلّ نقطة، ودا جزو مونت كارلو،
واختيار اللون *الأنسب* لكل نقطة باعتبار الصورة الكاملة، ودا موضوع الونسة المهمّة المؤجّلة.
حساب لون كلّ نقطة بسيط، لكن ما ساهل؛
ح تجر خط من عينك، مرورا بالنقطة في الشاشة،
وتشوفه وقع وين في الأجسام الموجودة في المنظر
(اللي هو تصميم بالكمبيوتر برضو؛ بس دا برّة إطار شغلي الحالي)
لكن مجرّد تحديد النقطة في جسم، ومعرفة إنّه الجسم دا احمر، ما كفاية عشان تورّيك اللون الصحيح.
كيف؟
الجسم الأحمر دا أملس وللا خشن؟
قاعد في الشمس وللا في الضل؟
(الشمس هينة، لو عندك لمبة نايلون محتاج تشوف النقطة دي "شايفة" قدر كيف من اللمبة؛ نقطة نقطة؛ لمبة لمبة 😩)
في أجسام تانية عاكسة فيو وللا لا؟
عشرات الأسئلة،
تنتج عنها عشرات الأبعاد؛
فتحلّ اللعنة،
ومونت كارلو تحلّ اللعنة
اللعنة!!
شارك هذا المقال :

ليست هناك تعليقات:

إرسال تعليق

 
Support : Creating Website | Johny Template | Mas Template
copyright © 2011. سوداكون - All Rights Reserved
Template Created by Creating Website
Proudly powered by Blogger