#ونسة
-- ماهية الهندسة ١ --
"ماهي الهندسة؟ ما الذي تتوقّع أن تجده في هذه الكلّية؟"
"ما هو الأساس في تقسيم الهندسات إلى مدنيّة، كهربائية، الخ؟"
..
هذه الأسئلة وغيرها سألتها لطلّاب دفعة هندسة 03 (إن لم تخنّي الذاكرة)، كلّ تيوتوريال رسم هندسي كنت بسأل سؤال؛ وبطلب منّهم يرجعوا لي بي إجابات..
عن السؤال الأوّل قلت ليهم "المفروض نحنا النورّيكم ما هي الهندسة، لكن ح تستفيدوا أكتر لو مشيتوا سألتو براكم"
بعد فترة سألني أحدهم:
🙂 ماهي الهندسة؟
😎 أنا مش قلتا ليك أمشي واسأل؟
🙂 مشيت سألت سناير ومهندسين لكن بصراحة ما طلعت بإجابة مفيدة!
😎 أيوااا، دي هي الفايدة الأكبر الأنا قاصدها: مهندسين كتيرين ما عارفين هندسة يعني شنو!
طبعا زملاننا القدرنا الليلة، واللي اشتغلوا فعلا مهندسين، فاهمين هندسة يعني شنو؛ لكن لو رجعتوا بي ذاكرتكم ح تلقونا رحنا لينا كم سنة كدا!
لذلك يلزمنا تنوير الأجيال البعدنا، والناس الحولنا، بمعنى الهندسة؛
كان عندي آمال عراض في الموضوع دا،
لكن حسّة ما لاقي مروّة لي أكتر من ونسة الفيسبوك دي؛
فشي من لا شي بس كفاية!
* * * * * *
-- الهندسة تعني تسخير الموارد لتحقيق المنافع وحلّ المشاكل --
طبعا دا ما تعريف ستاندارد، بل هو تعريفي الخاص؛
في صياغة تناسب ذوق عشّاق التأصيل 😄.
المنافع دي تشمل حاجات كتيرة غير موجودة الناس دايراها؛
والمشاكل تشمل كتير من الحاجات الما ماشّة كما ينبغي؛
أمّا الموارد فتشمل معظم ما هو متاح!
طبعا واضح إنّه التعريف فضفاض جدّا؛
لكن ما أكثر فضفضة من استخدام الناس لي كلمة هندسة.
* * * * * *
-- المعرفة وقود الهندسة --
زي ما قلنا الموارد كتيرة، لكن لعلّ أهمّها المعرفة العلميّة؛
ماا شان تقدر تسخّر الأشياء بتحتاج لي معرفة بي طبيعتها؛ وللا شنو؟
عشان كدا التعريفات الأكثر ضبطا بتذكر الحاجة دي صراحة
"utilization of scientific and mathematical knowledge etc etc"
خلّينا ناخد أمثلة:
- "الحرارة الكامنة للتصعيد للماء عالية"؛ دي معلومة درسناها في الثانوي؛
لمن تقوم توظّف الخاصّية دي، مع خواص تانية، وتعمل مكيّف موية، فدي هندسة.
- "البترول أخف من الماء" دي معلومة علميّة؛ بيستخدموها مهندسين البترول بي إنّهم يضخّوا موية في قاع بير البترول شان يجي باظّي.
- الهواء ضغطه بيقل لمن يتحرّك سريع؛ شان كدا لمن تمشي سريع جنب الباب بيمشي عليك (لو في زول لاحظ الحاجة دي)؛ دي المعرفة العلميّة المبني عليها هندسة الطائرات.
وراء كلّ قطعة هندسيّة حولنا، مبنى، عربيّة، موبايل، إنترنت، تلاجة، مروحة، أشياء لا يمكن حصرها، كلّها داخلة فيها معارف علميّة تمّ توظيفها بواسطة المهندسين
ولــــــــــــــذلـــــــــك:
أكتر كلّيّات الهندسة في الدنيا لا تدرّس الهندسة،
بل تدرّس العلوم الهندسيّة،
تلك المرجو استخدامها بواسطة المهندسين: ناس الكهرباء بيدرّسوهم خصائص الكهرباء، ناس المدنيّة بيدرّسوهم خصائص التربة والحديد والهياكل والخ، ناس الكيميائيّة بيدرّسوهم خصائص المواد، وهكذا
* * * * * *
-- العلوم هندسيّة ما هندسة؟ طيّب الهندسة شنو؟ --
الهندسة نفسها فن، ما علم.
يعني شنو؟
الفن يسعى لخلق الجديد، والعلم يسعى لفهم الموجود.
(سؤال جانبي: الطب فن وللا علم؟)
يللا استخراج المعرفة العلميّة البيستخدموها المهندسين دا ما شغل المهندسين؛ المهندسين شغلهم يستفيدوا من المعارف دي ويسخّروها.
مضطر أقيف هنا للفطور، ونواصل في المرّة القادمة ونستنا عن طبيعة الهندسة..
تحرير:
شايف حتّة "حلّ المشاكل" دي خلقت لبس؛
باعتبار إنّه في اختصاصات كتيرة شغلهم يحلّوا مشاكل،
زي الطب مثلا،
فهل ح نسمّيها هندسة ؟
المقصود بحلّ المشاكل الحلول المبتكرة، مش العلاج؛
يعني مثلا معالجة الملاريا وللا السرطان دا طب؛
لكن تركيب أطراف صناعيّة، وفق دراية جيّدة بالتشريح والجهاز العصبي والخ، دا هندسة (طبّيّة)
فالهندسة عادة بتكون حاجة progressive، مش مجرّد maintenance.
ليست هناك تعليقات:
إرسال تعليق