الفاتح جبرا
أرجعت بعض التبريرات الحكومية ما حدث في جسر المنشية بأنه كان بسبب هجمات (الفئران) التي أدت لتآكل وتصدع الكوبري ولما كان العبد لله لا كتب عن شئ إلا بعد أن يستمع أن يستمع إلى جميع وجهات النظر فقد (ركب عربيتو) صباحاً متجهاً إلى الناحية الشرقية من كبري المنشية مؤملاً أن أقوم بمقابلة السيد الجقر ومعرفة رأئه في هذا الإتهام الخطير الذي يمكن أن يوضع في خانة (التخريب) .
كان في إعتقادي انني وبمجرد الترجل من العربة والإتجاه نحو مكان (الضرر) أسفل الكبري سوف أجد عشرات (الجقور) وهي تمارس عملها في (قضم) السيخ و(قرقشة) طبقات الاسمنت غير انني وجدت المكان خاليا من جنس (فأر) ، وأنا اتجول بنظري لحصر الأماكن المصابة إذ لمحت فاراً صغيرا يخرج من أحد الجحور فناديتة :
– أهلك ديل وين يا جنا
– نايمين لسه ما صحوا
– طيب انا عاوز أتكلم مع الجقر
– الجقر الأكل الكوبري !
– وإنتا عرفتا كيف؟
– ما جابوها في الجرايد … ومن اليوم داك (الجقر) كلم باقي الجقور كوووولها ما تطلع عشان قالو جايبين ليهم (كدايس) من الصين !
– أمشي كلمو وطمنو قول ليهو ده عمك جبرا عايزك تثبت للدنيا براءتك من التهمة دى
لم يلبث الفأر الصغير أن أعطاني ظهره مهرولاص نحو أحد الجحور وبعد برهة خرج أحد الجقور المدغلبه من (الجحر) وهو يرفع يديه في إستنكار وهوً يقول :
– خلاس رموها فينا … خلاس رموها فينا
قلت له وأنا أتصنع الإبتسام لإمتصاص ثورته :
– هدي أعصابك يا أبوالجقور .. أنا جاييك عشان تثبت براءتك إنتا وأهلك وعشيرتك !
– عليك الله فضلت لينا أعصاب نحنا … البيوت بتاعت الناس عدمت الشئ البياكلوهو قمنا خليناها وجينا البحر .. يجو يقولو ليك أكلنا الكبري .. الجماعة ديل يعني لازم يلقوا ليهم شماعه يعلقوا فيها أخطاءهم؟
– يعني إنتو ما أكلتو الكبري ده؟
– (يصمت برهة) : والله شوف (الحتت) البتتاكل أكلناها !
– (في إستغراش) : هو بالله في حتت في الكبري ده بتتاكل !
– نعمل ليهم شنووو ..أول ما نعمل شاي الصباح برسل الولد يجيب لينا شوية بسكويت أقصد أسمنت من (الحتة) دييييك والله حاجه ما تخلص
– والسيخ كمان بتاكلوهو
– سيخ شنوووو؟ هو ده إسمو سيخ … ده فسيخ .. لمن يصديء بيبقي (كفتة) ساي
– بتاكلوهو ..
– تصدق يا أستاذ ده أحسن (مزه) .. الجقور البتشلع كوووولها أول ما الليل يجي كل واحد يخت (قزازتو) ويخت ليهو قدامو سيخة سيختين !
– والعجب (الحصاص) ؟
– مالو ؟ ..
– والله ده ما عارفين جابوهو من وين (الشفع) ميتين فيهو موت لو الواحد ما ختو ليهو حصاصة حصاصتين سندوتش الصباح يحلف ما يمشي المدرسة
– يعني هسه كلام الجماعة ده صاح وإنتو العملتو التخريب ده لحدت ما الكبري بقي عاوز صيانة
– ياخي الجماعة ديل بيبالغو … هو أنحنا جقور اصلو وللا أسلحة دمار شامل .. هسه (المواد) دي كان ما هشة وبتتاكل كان قدرنا أكلناها !
– لكن هم قالو أنو إنتو حفرتو؟
– نحفر شنو انحنا بننقب ذهب؟ المواد الأتبني بيها الكبري دي لا تقاوم !
– هسه ما خايفين يعملو ليكم إباده ؟
– والله من ناحية خايفين .. فخايفين عشان كده قررنا نرحل !
– وماشين وين !
– كبري الحلفايا .. والله قالو ليك فيهو (سيخ) بسكويت سااااكت والعجب الأسمنت (إيسكريم عديييييل كده )
كسرة :
هذا المقال برعاية الهيئة العامة للطرق والجقور !
كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)
ليست هناك تعليقات:
إرسال تعليق